گېزىتىمىز، ئۈرۈمچى، 7 ـ ئاينىڭ 21 ـ كۈنى خەۋىرى ئانار بۇلۇت\شىنجاڭ گېزىتى مۇخبىرى رېن چۇنشياڭ خەۋەر قىلىدۇ: 7 ـ ئاينىڭ 24 ـ كۈنىدىن 26 ـ كۈنىگىچە، «بىلىم مۈلۈك ھوقۇقى ئارقىلىق رايونلارنىڭ ئورتاق تەرەققىياتىنى ئىلگىرى سۈرەيلى» باش تېما قىلىنغان جۇڭگو − ئوتتۇرا ئاسىيا بىلىم مۈلۈك ھوقۇقى ھەمكارلىق مۇنبىرى شىنجاڭ خەلقئارا يىغىن ـ كۆرگەزمە مەركىزىدە ئۆتكۈزۈلىدۇ.
بۇ قېتىمقى مۇنبەرنى دۆلەت بىلىم مۈلۈك ھوقۇقى ئىدارىسى، ئاپتونوم رايونلۇق خەلق ھۆكۈمىتى مەسئۇل بولۇپ ئۆتكۈزىدۇ، ئاپتونوم رايونلۇق بازار نازارەت قىلىش ـ باشقۇرۇش ئىدارىسى (بىلىم مۈلۈك ھوقۇقى ئىدارىسى)، ئۈرۈمچى شەھەرلىك خەلق ھۆكۈمىتى، سانجى خۇيزۇ ئاپتونوم ئوبلاستلىق خەلق ھۆكۈمىتى ئۆتكۈزۈشنى ئۈستىگە ئالغان.
مۇنبەر ئاساسلىقى جۇڭگو − ئوتتۇرا ئاسىيا بىلىم مۈلۈك ھوقۇقى ھەمكارلىق مۇنبىرى، ئوتتۇرا ئاسىيا بىلىم مۈلۈك ھوقۇقى يۇقىرى دەرىجىلىكلەر مۇھاكىمە كۇرسى، ئۈرۈمچى ـ سانجى ئىككى جايدىكى كارخانىلاردا نەق مەيداندا تەكشۈرۈپ تەتقىق قىلىش قاتارلىق پائالىيەتلەرنى ئۆز ئىچىگە ئالىدۇ. مۇنبەر مەزگىلىدە، يىغىنغا قاتناشقان ۋەكىللەر يەنە شىنجاڭنىڭ جۇغراپىيەلىك بەلگىسىگە ئائىت تىپىك دېلو مىساللىرى توغرىسىدىكى تونۇشتۇرۇشنى ۋە يېشىل ئېنېرگىيە تىپ ئۆزگەرتىشكە ئائىت دېلو مىساللىرى توغرىسىدىكى تونۇشتۇرۇشنى ئاڭلايدۇ ھەم جۇڭگو پەنلەر ئاكادېمىيەسى شىنجاڭ فىزىكا ـ خىمىيە تېخنىكا تەتقىقات ئورنى، شىنجاڭ ئۇيغۇر دورىگەرلىكى چەكلىك مەسئۇلىيەت شىركىتى، ئالاھىدە تىرانسفورموتور سانائىتى پاي چەكلىك شىركىتى قاتارلىقلارنى نەق مەيداندا تەكشۈرۈپ تەتقىق قىلىدۇ.
مۇنبەرنىڭ ئۆتكۈزۈلۈشىدىكى مەقسەت مەۋقەنى رايون ئورنى ئەۋزەللىكىگە قويۇپ، «بىر بەلباغ، بىر يول»نى ئورتاق قۇرۇشنى چۆرىدەپ، بىلىم مۈلۈك ھوقۇقى ئالماشتۇرۇش مېخانىزمىنى ئورنىتىپ، تاكامۇللاشتۇرۇپ، ئۆزئارا مەنپەئەت يەتكۈزۈش ھەمكارلىق سۇپىسى بەرپا قىلىپ، جۇڭگو − ئوتتۇرا ئاسىيا ئىقتىساد ـ سودا ئالاقىسى ۋە يېشىل، ئىجادىي تەرەققىياتنى كۈچلۈك تىرەك بىلەن تەمىنلەش؛ جۇڭگو − ئوتتۇرا ئاسىيا بىلىم مۈلۈك ھوقۇقى نۇقتىلىق ساھەلىرىدىكى ھەمكارلىققا تۈرتكە بولۇپ، پەن ـ تېخنىكىدا يېڭىلىق يارىتىشنىڭ يېتەكچىلىك رولىنى تېخىمۇ ياخشى جارى قىلدۇرۇپ، يىپەك يولى ئىقتىساد بەلبېغى رايونىدا يېڭىلىق يارىتىش ئېگىزلىكى بەرپا قىلىپ، شىنجاڭ يىپەك يولى ئىقتىساد بەلبېغى بىلىم مۈلۈك ھوقۇقى كۈچلۈك رايونى قۇرۇلۇشىنى تېزلىتىش؛ جۇڭگونىڭ ئوتتۇرا ئاسىيادىكى ھەرقايسى دۆلەتلەر بىلەن بولغان ئۆزئارا ئىشىنىشىنى ئاشۇرۇپ، ئەمەلىي ھەمكارلىق ۋە خەلقئارا ھەمكارلىشىشنىڭ چوڭقۇرلىشىشى، پۇختا بولۇشىغا تۈرتكە بولۇپ، جۇڭگو − ئوتتۇرا ئاسىيا بىلىم مۈلۈك ھوقۇقى ھەمكارلىق ئالماشتۇرۇش مۇھىم سۇپىسى بەرپا قىلىش ھەم دائىملاشتۇرۇش مېخانىزمىنى شەكىللەندۈرۈش. ھازىر مۇنبەرنىڭ تۈرلۈك تەييارلىق خىزمەتلىرى تەرتىپلىك ئىشلىنىۋاتىدۇ.
