گېزىتىمىز، ئۈرۈمچى 2 ـ ئاينىڭ 29 ـ كۈنى خەۋىرى ئانار بۇلۇت\شىنجاڭ گېزىتى مۇخبىرى لۇ فېڭباۋنىڭ جۇڭگو تۆمۈريولى ئۈرۈمچى ئىدارىسى گۇرۇھى چەكلىك شىركىتىدىن ئىگىلىشىچە، يېڭى يىل كىرگەندىن بۇيان، شىنجاڭنىڭ ئىقتىسادى جانلىنىپ، تىرانسپورت ئېھتىياجى ئاشقان، ئالدىنقى ئىككى ئايدا، شىنجاڭ تۆمۈريولىنىڭ كۆپ تۈرلۈك تىرانسپورت كۆرسەتكۈچىدە يېڭى يۇقىرى سەۋىيە يارىتىلغان، يۈك تىرانسپورت مىقدارى 36 مىليون 790 مىڭ توننىغا يېتىپ، بۇلتۇرقى ئوخشاش مەزگىلدىكىدىن %4.8 ئاشقان.
بۇ يىل، شىنجاڭ تۆمۈريول تارماقلىرى دىققەتنى ئاپتونوم رايوننىڭ «سەككىز چوڭ كەسىپ توپى» قۇرۇلۇشىغا مەركەزلەشتۈرۈپ، تىرانسپورت قۇرۇلمىسىنى ئەلالاشتۇرۇش ئورۇنلاشتۇرما ـ تەلىپىنى ئەمەلىيلەشتۈرۈپ، «تاشيولدا توشۇشنى تۆمۈريولدا توشۇشقا ئۆزگەرتىش»نى ئەمەلىيلەشتۈرۈش سالمىقىنى كۈچەيتىپ، تۆمۈريول زامانىۋى ئەشيا ئوبوروتى سىستېمىسى قۇرۇلۇشىنى تېز ئالغا سىلجىتىپ، كۆمۈر، پولات ـ تۆمۈر، خىمىيەۋى ئوغۇت، ئاشلىق، پاختا قاتارلىق نۇقتىلىق ماددىي ئەشيالارنى توشۇشقا پۈتۈن كۈچ بىلەن كاپالەتلىك قىلدى.
«بىز ئىستراتېگىيەلىك خېرىدارلار بىلەن مۇددەتتىن بۇرۇن ئۇدۇللىشىپ، يۇقىرى پەللە مەزگىلىگە تاقاشتۇرماي دەم ئېلىشقا قويۇپ بېرىش، مۇددەتتىن بۇرۇن مەھسۇلاتنى ئاشۇرۇش قاتارلىق تەدبىرلەرنى قوللىنىپ، يېتەرلىك مال مەنبەسى تەييارلاپ، ۋاگونغا قاچىلاش پىلانىنىڭ نەقلىشىشىگە كاپالەتلىك قىلدۇق» دېدى جۇڭگو تۆمۈريولى ئۈرۈمچى ئىدارىسى گۇرۇھى چەكلىك شىركىتى يۈك تىرانسپورت بۆلۈمىنىڭ مۇئاۋىن مۇدىرى خۇاڭ جيەن.
شىنجاڭ تۆمۈريول تارماقلىرى توشۇش يوشۇرۇن كۈچىنى چوڭقۇر قېزىپ، يۈك تىرانسپورت پويىزلىرىنى تەشكىللەش سالمىقىنى زورايتىپ، پويىزلارنىڭ ئايلىنىشى، يۈرۈشۈشىنى ئىلگىرى سۈرۈپ، توشۇش ئۈنۈمىنى ئۆستۈرۈش ئارقىلىق، يۈك بولسىلا پويىز بولۇش، پويىز بولسىلا تېز توشۇشقا ھەقىقىي كاپالەتلىك قىلىپ، يەككە كۈندە 10 مىڭ 500 ۋاگون ئەتراپىدا يۈك قاچىلاش ھالىتىنى ساقلىدى، ئەڭ كۆپ بولغاندا يەككە كۈندە 11 مىڭ 498 ۋاگون يۈك قاچىلىدى.
ئۈرۈمچى ـ جياڭجۈنمياۋ تۆمۈريولى شىنجاڭنىڭ كۆمۈر تىرانسپورتىدىكى ئاساسلىق يول، بۇ يىلدىن بۇيان، جياڭجۈنمياۋ ـ نوم تۆمۈريولىنىڭ قاتناش باشلاپ تىجارەتكە كىرىشتۈرۈلۈشىگە ئەگىشىپ، شەرقىي شىنجاڭ تۆمۈريول ئايلانما لىنىيەسى شەكىللىنىپ، تىرانسپورتتىكى توسۇق نۇقتىلار راۋانلاشتۇرۇلدى، ئۈرۈمچى ـ جياڭجۈنمياۋ تۆمۈريولىنىڭ تىرانسپورت ئىقتىدارى يەنىمۇ قويۇپ بېرىلىپ، يۈك تىرانسپورت مىقدارىنى ئاشۇرۇشتىكى ئاساسلىق ئېشىش قۇتۇپىغا ئايلاندى.
«ئۈرۈمچى ـ جياڭجۈنمياۋ تۆمۈريولىدا يەككە كۈندە قاتنىغان پويىز سانىنى ئەڭ كۆپ بولغاندا 100 قېتىمغا يەتكۈزۈپ، يۈك توشۇش مىقدارىدا يېڭى يۇقىرى سەۋىيە يارىتىشقا تۈرتكە بولدۇق» دېدى جۇڭگو تۆمۈريولى ئۈرۈمچى ئىدارىسى گۇرۇھى چەكلىك شىركىتى ئۈرۈمچى تۆمۈريول ئەشيا ئوبوروتى مەركىزىنىڭ مۇئاۋىن باش دىرېكتورى يې شياۋجۈن.
ھەرقايسى تۆمۈريول پاسىل ئېغىزلىرىدىكى پويىزنى ئۆتكۈزۈپ بېرىش ـ ئۆتكۈزۈۋېلىش ئۈنۈمى تۆمۈريول تىرانسپورت ئۈنۈمىگە مەلۇم دەرىجىدە تەسىر كۆرسىتىدۇ. شىنجاڭ تۆمۈريول تارماقلىرى لەنجوۋ ـ شىنجاڭ تۆمۈريولى، لىنخې ـ قومۇل تۆمۈريولى، گولمۇد ـ كورلا تۆمۈريولىنىڭ پاسىل ئېغىزلىرىدىكى پويىزنى ئۆتكۈزۈپ بېرىش ـ ئۆتكۈزۈۋېلىشنى تەشكىللەش سالمىقىنى زورايتىپ، لىنخې ـ قومۇل، گولمۇد ـ كورلا تۆمۈريوللىرىنىڭ يول ئىقتىدارىدىن تولۇق، ياخشى پايدىلىنىپ، ئەمەلىي يۈك قاچىلانغان پويىزلارنىڭ يۇقىرى ئۈنۈملۈك قاتنىشىنى پائال تەشكىللىدى.
«پويىزلارنى تېز سۈرئەتتە ئۆتكۈزۈپ بېرىش ـ ئۆتكۈزۈۋېلىش ئارقىلىق، ئىشلەتكىلى بولىدىغان قۇرۇق ۋاگونلارنىڭ سانى كۆپەيتىلىپ، يۈك قاچىلىغىلى بولىدىغان ۋاگونلارنىڭ ھەممىسىگە يۈك قاچىلاش ئىشقا ئاشۇرۇلدى، شۇنىڭ بىلەن بىللە، يۈك قاچىلانغان پويىزلارنىڭ تېز سۈرئەتتە قاتنىشىغا ھەقىقىي كاپالەتلىك قىلىنىپ، يول ئىقتىدارى تولۇق قويۇپ بېرىلدى» دېدى جۇڭگو تۆمۈريولى ئۈرۈمچى ئىدارىسى گۇرۇھى چەكلىك شىركىتى ئورۇنلاشتۇرۇش ئورنى پىلان ئورۇنلاشتۇرۇش ئىشخانىسىنىڭ مۇئاۋىن مۇدىرى لى خەي. ئالدىنقى ئىككى ئايدا، لەنجوۋ ـ شىنجاڭ تۆمۈريولىنىڭ ئەنبېي ۋوگزالى، لىنخې ـ قومۇل تۆمۈريولىنىڭ ۋۇتۇڭشۈي ۋوگزالى، گولمۇد ـ كورلا تۆمۈريولىنىڭ ماڭيا بازىرى ۋوگزالىدىن ئىبارەت ئۈچ پاسىل ئېغىزىدا كۈنىگە ئوتتۇرا ھېساب بىلەن 119.5 جۈپ پويىز ئۆتكۈزۈپ بېرىلگەن ـ ئۆتكۈزۈۋېلىنغان بولۇپ، بۇلتۇرقى ئوخشاش مەزگىلدىكىدىن 15.5 جۈپ كۆپەيدى.
