گېزىتىمىز، ئۈرۈمچى، 2 ـ ئاينىڭ 29 ـ كۈنى خەۋىرى ئانار بۇلۇت\شىنجاڭ گېزىتى مۇخبىرى رېن خۇانىڭ ئاپتونوم رايونلۇق بازار نازارەت قىلىش ـ باشقۇرۇش ئىدارىسىدىن ئىگىلىشىچە، يېقىندا، ئاپتونوم رايونىمىز «بازار نازارەت قىلىش ـ باشقۇرۇش ئىناۋەت سىستېمىسى قۇرۇلۇشىنىڭ يۇقىرى سۈپەتلىك تەرەققىياتىنى ئالغا سىلجىتىش توغرىسىدىكى بىرقانچە تەدبىر»نى ئوتتۇرىغا قويۇپ، ئىناۋەت ئۇچۇر سۇپىسى قۇرۇلۇشىنى ئالغا سىلجىتىش، بىرتۇتاش ئىجتىمائىي ئىناۋەت كودىنى باشقۇرۇشنى مۇكەممەللەشتۈرۈش قاتارلىق 23 تۈرلۈك تەدبىر ئارقىلىق، بازار نازارەت قىلىش ـ باشقۇرۇش ئىناۋەت سىستېمىسى قۇرۇلۇشىنىڭ يۇقىرى سۈپەتلىك تەرەققىياتىنى ئالغا سىلجىتىدىكەن.
ئىناۋەت ئۇل قۇرۇلۇشى جەھەتتە، ئاپتونوم رايونىمىز ئىناۋەت ۋەدىسى، ۋەدىسىدە تۇرۇشنى تەكشۈرۈش، لەۋزىدە تۇرمىغانلارنى جازالاپ ئاگاھلاندۇرۇش، ئىناۋەتنى ئەسلىگە كەلتۈرۈشنى باشقۇرۇش يېپىق ھالقىسىنى چۆرىدەپ، پۈتۈن زەنجىرلىك ئىناۋەتنى نازارەت قىلىش ـ باشقۇرۇش تۈزۈم سىستېمىسى بەرپا قىلىشقا تۈرتكە بولىدۇ. شۇنىڭ بىلەن بىللە، دۆلەت كارخانىلىرىنىڭ ئىناۋەت ئۇچۇرلىرىنى ئاشكارىلاش سىستېمىسى(شىنجاڭ)، ئىناۋەتنى نازارەت قىلىش ـ باشقۇرۇش قاتارلىق سىستېمىلارنى سىجىل ئەلالاشتۇرۇپ، دەرىجىسىنى ئۆستۈرۈپ ئۆزگەرتىپ، ئىناۋەت ئۇچۇرلىرىنى توپلاش، ئاشكارىلاش، ئورتاق بەھرىلىنىشنى كۈچەيتىدۇ.
نۇقتىلىق ساھەلەرنىڭ سەمىمىيەت قۇرۇلۇشى جەھەتتە، ئاپتونوم رايونىمىز ھەر دەرىجىلىك بازار نازارەت قىلىش ـ باشقۇرۇش تارماقلىرى(ئورۇنلار)نىڭ سىياسەت ۋەدىسىگە ئەمەل قىلىشى ۋە ئىمزالىغان تۈرلۈك توختاملارنىڭ ئىناۋىتىنى نازارەت قىلىشىنى كۈچەيتىپ، ھۆكۈمەت ئىشلىرىدا لەۋزىدە تۇرمىغانلىق ئۇچۇرلىرىنى قانۇن بويىچە ئاشكارىلايدۇ ھەم ئالاقىدار جاۋابكارلارنىڭ قانۇنغا خىلاپلىق قىلىپ لەۋزىدە تۇرمىغانلىق قىلمىشىنى جازالاپ ئاگاھلاندۇرىدۇ. ئاپتونوم رايوننىڭ بىرتۇتاش ئورۇنلاشتۇرمىسى بويىچە، ھۆكۈمەت ئوتتۇراھال، كىچىك كارخانىلارغا بېرىشكە تېگىشلىك ھېسابتىكى پۇلنى نېسى قالدۇرۇشنىڭ ئالدىنى ئېلىش ۋە ئۇنى تۈگىتىش مەخسۇس ھەرىكىتىنى ئەمەلىيلەشتۈرۈشنى ئالغا سىلجىتىدۇ. بۇنىڭدىن باشقا، يەنە دېھقان ئىشلەمچىلەرنىڭ ئىش ھەققىنى نېسى قالدۇرۇش، ئىجتىمائىي سۇغۇرتا، كاپالەتلىك تۇرالغۇ قاتارلىق ساھەلەردىكى قانۇنغا ئېغىر دەرىجىدە خىلاپلىق قىلىپ لەۋزىدە تۇرمىغانلار تىزىملىكى تۈزۈمىنى ئەمەلىيلەشتۈرۈشكە تۈرتكە بولۇپ، قانۇن ـ بەلگىلىمە بويىچە بىرلىشىپ جازالاپ ئاگاھلاندۇرۇشنى يولغا قويىدۇ.
ئىناۋەتنى ئاساس قىلغان يېڭىچە نازارەت قىلىش ـ باشقۇرۇش مېخانىزمىنى مۇكەممەللەشتۈرۈش جەھەتتە، ئاپتونوم رايونىمىز كارخانىلارغا ئالاقىدار تىجارەت ئىجازىتى ئىش تۈرلىرى بويىچە خەۋەرلەندۈرۈش ـ ۋەدە بېرىش، ئىناۋەتنى ئەسلىگە كەلتۈرۈش قاتارلىق تۈرلەر بويىچە ئىناۋەت ۋەدىسى بېرىشنى ئومۇميۈزلۈك يولغا قويىدۇ. شۇنىڭ بىلەن بىللە، ئىناۋەت سۈرۈشتۈرۈشنى كەسىپ بېجىرىش تەرتىپىگە كىرگۈزۈپ، مەمۇرىي تەستىق، بازار ئىجازىتى قاتارلىق جەريانلاردا، تىجارەت سۇبيېكتلىرىنىڭ ئىناۋىتىنى تەكشۈرىدۇ ھەم تەكشۈرۈش نەتىجىسىگە ئاساسەن قانۇن ـ بەلگىلىمە بويىچە ئىناۋەت جەھەتتە بىرلەشمە مۇكاپاتلاش ـ جازالاشنى قانات يايدۇرىدۇ.
بۇنىڭدىن باشقا، ئاپتونوم رايونىمىز يەنە ئىناۋەتلىك مەبلەغ يۈرۈشتۈرۈش مۇلازىمىتى ۋە مەھسۇلاتلىرىدا يېڭىلىق يارىتىپ، «ئىناۋەتلىك قەرز» «شىنجاڭ سۈپەت ئىناۋەتلىك قەرز پۇلى» قاتارلىق سۇپىلارنى تىجارەت سۇبيېكتلىرىنىڭ سۈپەت، ئىناۋەت ئەھۋالىنى ئەكس ئەتتۈرىدىغان ئۇچۇرلار بىلەن تەمىنلەپ، تىجارەت سۇبيېكتلىرى، بولۇپمۇ كىچىك، ئۇششاق كارخانىلار، يەككە سودا ـ سانائەتچىلەرنىڭ باج قايتۇرۇش، ھەقنى كېمەيتىش ۋە پۇل مۇئامىلە جەھەتتىن يۆلەش قاتارلىق سىياسەتلەردىن بەھرىمەن بولۇشىنى تىرەك بىلەن تەمىنلەيدۇ.
