گېزىتىمىز، ئۈرۈمچى، 2 ـ ئاينىڭ 29 ـ كۈنى خەۋىرى ئانار بۇلۇت\شىنجاڭ گېزىتى مۇخبىرى خېي خۇڭۋېي خەۋەر قىلىدۇ: 2 ـ ئاينىڭ 29 ـ كۈنى، ئاپتونوم رايونلۇق سودا نازارىتى تۇنجى تۈركۈمدە شىنجاڭنىڭ كونا داڭلىق ماركىسى نامىغا ئېرىشكەن 35 داڭلىق ماركا ھەم كارخانىنى ئېلان قىلدى.
ئۈرۈمچى شەھىرى تىيانشان رايونى جەنۇبىي تىنچلىق يولى ۋۇۋۇزى پاقلان گۆشى مەخسۇس سېتىش دۇكىنىنىڭ «ۋۇۋۇزى پاقلان گۆشى» داڭلىق ماركىسى، شىنجاڭ بەيخۇاسۈن تېز تاماقخانىسى زەنجىرسىمان چەكلىك مەسئۇلىيەت شىركىتىنىڭ «بەيخۇاسۈن» داڭلىق ماركىسى، شىنجاڭ دوستلۇق(گۇرۇھ) پاي چەكلىك شىركىتىنىڭ «دوستلۇق گۇرۇھى» داڭلىق ماركىسى، شىنجاڭ شىخو پىۋىسى چەكلىك مەسئۇلىيەت شىركىتىنىڭ «شىخو ماركىسى» داڭلىق ماركىسى. شىنجاڭ تىيانشان يۇڭ توقۇمىچىلىق پاي چەكلىك شىركىتىنىڭ «تىيانشان» داڭلىق ماركىسى قاتارلىق كونا داڭلىق ماركا كارخانىلىرىنىڭ داڭلىق ماركىلىرى تىزىملىككە كىرگۈزۈلدى.
شىنجاڭنىڭ كونا داڭلىق ماركىلىرىنى ئىجادىي تەرەققىي قىلدۇرۇشنى ئىلگىرى سۈرۈپ، شىنجاڭنىڭ كونا داڭلىق ماركىلىرىنىڭ سودا ئوبوروتى، ئىستېمالنى ئىلگىرى سۈرۈش، سۈپەت باشقۇرۇش، تېخنىكىدا يېڭىلىق يارىتىش، داڭلىق ماركا قۇرۇلۇشى، مەدەنىيەتكە ۋارىسلىق قىلىش قاتارلىق جەھەتلەردىكى ئۈلگە كۆرسىتىش، يېتەكلەش رولىنى تولۇق جارى قىلدۇرۇش ئۈچۈن، ئاپتونوم رايونلۇق سودا نازارىتى كۆپ تارماق بىلەن بىرلىشىپ، «شىنجاڭنىڭ كونا داڭلىق ماركىلارنى بېكىتىش، باشقۇرۇش چارىسى»(تۆۋەندە قىسقارتىلىپ «چارە» دېيىلدى)نى تۈزۈپ ئېلان قىلىپ، شىنجاڭنىڭ كونا داڭلىق ماركا كارخانىلىرىنى يېتىلدۈرۈش، يۆلەش ۋە قوغداشنى يەنىمۇ كۈچەيتىپ، شىنجاڭنىڭ كونا داڭلىق ماركىلىرىنى بېكىتىش، باشقۇرۇشنى قېلىپلاشتۇرۇپ، شىنجاڭنىڭ كونا داڭلىق ماركىلىرى ئىگىلىرىنىڭ قانۇنلۇق ھوقۇق ـ مەنپەئىتىنى قوغداپ، شىنجاڭنىڭ كونا داڭلىق ماركا كارخانىلىرىنىڭ داڭلىق ماركا قىممىتىنى ئۆستۈرۈپ ۋە مەدەنىيەت ئىچكى خاس مەزمۇنىنى بېيىتىپ، شىنجاڭنىڭ كونا داڭلىق ماركىلىرىنى ھەرىكەت ھالىتىدە باشقۇرۇش مېخانىزمىنى ئورنىتىپ، شىنجاڭنىڭ كونا داڭلىق ماركىلىرىنى قوغداش ۋە ئۇنىڭغا ۋارىسلىق قىلىش داۋامىدا ئىجادىي تەرەققىي قىلدۇرۇشنى ئىلگىرى سۈردى.
«چارە»گە ئاساسەن، «شىنجاڭنىڭ كونا داڭلىق ماركىسى»نى بېكىتىشتە تۆۋەندىكى سەككىز شەرت ھازىرلىنىشى كېرەك: «تاۋار ماركىسى قانۇنى»دىكى ئالاقىدار بەلگىلىمىلەرگە ئۇيغۇن بولۇش، تىزىمغا ئالدۇرۇلغان تاۋار ماركىسىنىڭ ئىگىدارلىق ھوقۇقى ياكى ئىشلىتىش ھوقۇقىغا ئىگە بولۇش؛ داڭلىق ماركا ئىجاد قىلىنغىنىغا 30 يىل(30 يىلنى ئۆز ئىچىگە ئالىدۇ)دىن ئاشقان بولۇش؛ ئۆزگىچە مەھسۇلات، ھۈنەر ـ سەنئەت ياكى مۇلازىمەتكە ۋارىسلىق قىلغان بولۇش؛ جۇڭخۇا مىللىتىنىڭ مۇنەۋۋەر ئەنئەنىسىگە ۋارىسلىق قىلغان كارخانا مەدەنىيىتى بولۇش؛ جۇڭخۇا مىللىتى خاسلىقى ۋە شىنجاڭنىڭ روشەن رايون مەدەنىيەت ئالاھىدىلىكىگە ئىگە بولۇش، تارىخ قىممىتى ۋە مەدەنىيەت قىممىتىگە ئىگە بولۇش؛ ياخشى ئىناۋەتكە ئىگە بولۇش، جەمئىيەتتە كەڭ كۆلەمدە قەلبتىن ئېتىراپ قىلىشقا ۋە ئالقىشقا ئېرىشكەن بولۇش؛ تىجارەت ئەھۋالى ياخشى بولۇش ھەمدە بىرقەدەر كۈچلۈك ئىمكانىيەتلىك سىجىل تەرەققىيات ئىقتىدارىغا ئىگە بولۇش؛ دۆلەت ئىچى كاپىتالى(شياڭگاڭ، ئاۋمېن، تەيۋەننىمۇ ئۆز ئىچىگە ئالىدۇ) پاينى نىسپىي كونترول قىلغان بولۇش، تىجارەت ئەھۋالى ياخشى بولۇش ھەمدە بىرقەدەر كۈچلۈك ئىمكانىيەتلىك سىجىل تەرەققىيات ئىقتىدارىغا ئىگە بولۇش.
بۇلتۇردىن بۇيان، شىنجاڭ يېڭى بىر تۈركۈم جۇڭخۇا كونا داڭلىق ماركىلىرىنى ئىلتىماس قىلىش خىزمىتىنى تەشكىللەپ قانات يايدۇرۇپ، تارىخىي مەدەنىيىتى چوڭقۇر، ئىگىلىك باشقۇرۇشى قېلىپلاشقان، ئىجادىي تەرەققىي قىلىش ئىقتىدارى گەۋدىلىك بولغان بىر تۈركۈم كارخانىلارنى چوڭقۇر قېزىپ تاللىدى، سودا مىنىستىرلىقىغا شىنجاڭ ئىلى ئالاھىدە ھارىقى ئوقەتچىلىك پاي چەكلىك شىركىتى قاتارلىق يەتتە كارخانىنىڭ يېڭى بىر تۈركۈمدىكى جۇڭخۇا كونا داڭلىق ماركىلىرى قاتارىغا كىرىش ئىلتىماسىنى تەۋسىيە قىلدى. شىنجاڭ دىيىجياۋ گۇچۇڭ ھاراقچىلىق چەكلىك شىركىتىنىڭ «گۇچۇڭ» داڭلىق ماركىسى، شىنجاڭ سەنتەي ھاراقچىلىق (گۇرۇھ) چەكلىك شىركىتىنىڭ «سەنتەي» داڭلىق ماركىسى، شىنجاڭ 1 ـ ئىيۇل جياڭيۇ ئېچىتىش چەكلىك شىركىتىنىڭ «1 ـ ئىيۇل جياڭيۇ زاۋۇتى» داڭلىق ماركىسى قايتا تەكشۈرۈشتىن ئۆتۈپ، جۇڭخۇا كونا داڭلىق ماركىسى نامىغا ئېرىشتى. شىنجاڭ ئىلى ئالاھىدە ھارىقى ئوقەتچىلىك پاي چەكلىك شىركىتىنىڭ «ئىلى ماركىسى» داڭلىق ماركىسى يېڭى بىر تۈركۈمدىكى جۇڭخۇا كونا داڭلىق ماركىلىرىنى بېكىتىش تىزىملىكىگە مۇۋەپپەقىيەتلىك كىردى.
مۇخبىرنىڭ ئاپتونوم رايونلۇق سودا نازارىتىدىن ئىگىلىشىچە، شىنجاڭغا تونۇلغان داڭلىق ماركىلارنىڭ كونا داڭلىق ماركىلارغا ئايلىنىشىغا تۈرتكە بولىدىكەن ھەمدە كونا داڭلىق ماركا كارخانىلىرىنىڭ ئۆزگىچە سودا كوچىسى، ساياھەت مەنزىرە رايونى، شەھەر سودا چەمبىرىكىدە توپلىنىپ تەرەققىي قىلىشىغا ئىلھام ۋە مەدەت بېرىپ، بايرام ـ تەبرىكلەش پائالىيەتلىرى، كۆرگەزمە، ئېلېكتىرونلۇق سودا سۇپىسى، تاراتقۇ قاتارلىقلاردىن ئۈنۈملۈك پايدىلىنىپ، شىنجاڭنىڭ كونا داڭلىق ماركىلىرىنى تەشۋىق قىلىپ، شىنجاڭنىڭ كونا داڭلىق ماركا ھۈنەر ـ سەنئىتىنى نامايان قىلىپ، ئۇلارنى قوغداش، ۋارىسلىق قىلىش ۋە ئىجادىي تەرەققىي قىلدۇرۇشنى ئىلگىرى سۈرىدىكەن.
